العيد فرحة.. ياسلام!
العيد فرحة.. ياسلام.. وأجمل فرحة.. ياسلام..
كلمات أغنية أعتدنا أن نسمعها ونرددها في الع.. كلمات عندما تتردد بكثرة وتتسابق وسائل الإعلام في إذاعتها ليل ونهار نعرف أنه قادم إلينا فيبدأ كلا منا في إستعادة طقوسه التي تعود على أن يقوم بها في العيد..
طقوس غير ثابتة.. تتطور معنا كلما مر علينا العمر.. تختلف من شخص لأخر تبعا للفروق الطبقية ولكنها في النهاية تفوح منها روح العيد ورائحته التي ألفناها جميعا.
العيدية
طقوس العيد تظل هي الأفضل عند الأطفال، فتقول أسماء محمود، ثماني سنوات،: "بحب أول يوم العيد أصحي بدري علشان أروح أصلى العيد.. بس ساعات بتروح علي نومة وماما ما بتصحنيش.. و بعد الصلاة قرايبى بيروحوا يدبحوا بس أنا مبروحش معاهم.. وبعدين بنخرج نروح الملاهي ونركب مركب.. وأجيب بالعدية حلويات وأحوش الباقي علشان لو صاحبتي جه عيد ميلادها أجيبلها هدية أو اشترى حاجات ليها بعد العيد".
أما أحمد مصطفى، تسع سنوات، فيقول "بروح أصلى العيد في الجامع اللي جنب البيت علشان أكبّر مع الناس وبعد الصلاة علينا بيوزعوا شيبسى وشوكولاته ولعب وبالونات.. وبنروح بعد كده لقرايبنا وناخد العيدية وأشترى بيها بندقية وموبايل وأبحوش الباقي علشان لو ماما عايزة فلوس أسلفها.."!
وتقول شيماء محمد، 11 سنه،: "بوضب البيت مع ماما في الوقفة. وبصحي أصلى العيد وأرجع البيت ألبس اللبس الجديد وأروح لجدو وستو نعيد عليهم ويدونا العدية علشان اشترى حلويات وأكل كشري.. ولو الفلوس كتير أكل عند المليجى بتاع الفراخ وساعات ماما و بابا بيفسحونا في ماجيك لاند أو السندباد، وألعب في المراجيح هناك ولما بخرج مع صحابي بنروح النادى نلعب و نأكل همبرجر وبطاطس".
أما فايزة محمد، 12 سنة، فتقول "ما بعملش حاجه في الوقفة وأول يوم العيد بنصحي الفجر نصلى وبلبس لبس العيد وأروح مع أخواتي جنينة حلوة زي جنينة الفسطاط أو الحيوانات. وبشترى بالعدية حاجات بحبها عروسة.. حلويات.. كشري.. وألعب كل يوم في المراجيح اللي في الشارع عندنا".
عبد الرحمن إبراهيم، 12 سنة، يقول "أول حاجه بتوضأ ونصلى ونرجع نفطر ونسلم على أقاربنا ونتفسح في ماجيك لاند ودريم بارك أو الحديقة الدولية وبروح جراند مول اشترى حاجات وبحوش فلوس علشان أجيب حاجات للكمبيوتر بتاعي".
الكبار يختلفون
أما طقوس العيد عند من كانوا يوما صغار فتختلف، فتوقل نهى صلاح، 19 سنة،: "أنا وأصحابي بنتفق نصوم يوم الوقفة ونروح نفطر كلنا في الحسين وأول يوم العيد بنصلي الفجر في الجامع ونستنى صلاة العيد وبعد الصلاة بروح مع أصحابي نفطر في كافيه ونقعد شوية ونروح ننام.. وتقريبا ما بعملش حاجة باقى أيام العيد إلا زيارة الأقارب علشان صله الرحم".
أما باسل، 21 سنة، فيقول "أهم حاجة في العيد أني ألبس الجلابية الجديدة اللي لازم أشتريها كل عيد، وأروح أصلى مع أخواتي وأصحابي.. وبرجع أكل الفتة واللحمة.. ولكن أحسن حاجة في العيد أنه أجازة وبقضيها نوم وراحة وممكن أزور أقاربي وفي العيد الواحد يتجه شوية للروحانيات.. بس أوحش حاجه أنى كبرت ومبقتش باخد عيدية زي زمان وبقيت أنا اللي بدى العيدية لأقاربي الصغيريين.. بس ساعات بطنش".!
أما شريف محمد، 22 سنة، فيقول "العيد في مرسى مطروح هو الصلاة.. نجتمع مع أصحابنا يوم الوقفة، ونسهر حتى موعد صلاة العيد ويروح أهل البلد كلهم يصلوا في (الساحة).. و بعد الصلاة كل واحد يساعد أهله في الذبح و نفطر كلنا سوى ولو خرجنا بالليل نروح نقعد على قهوة".
أغلب الشباب توقف عن الخروج في العيد.. البعض يقول بسبب الزحمة.. والبعض الأخر يقول بسبب الماديات.. والبعض قالوا أنهم لم يعودوا يحسوا فرحة العيد.. فالعيد أصبح بلا طعم لأنك كلما كبرت في السن تعرف أن العيد عند بعض الناس مش فرحة وياسلام.. كلما كبرت تعرف أن العيد مسئولية ويحتاج الكثير من المال.. في زمن أصبح غالبية المصريين فيه يعيشون تحت خط الفقر.. وياسلام.
اقرأ أيضا
عيد الأضحى.. دماء ومخلفات!
في صلاة العيد.. كنت إماما!
العيد.. رقص ورهينة في محطة مصر!
شوية بلالين علي حبة زينة
التخصص يكسب.. في المدبح