شوية بلالين علي حبة زينة

الساعة الثامنة صباحا.. بعد القرآن الكريم وعلى الاصطباحه كده هتلاقى في وشك الأغنية العيدية التقليدية الأزلية التي لم تتغير من عصر الفراعنة

أهلا أهلا بالعيد

مرحب مرحب بالعيد

أهلا أهلا بالعيد

مرحب مرحب بالعيد

هيه هيه هيه

هييى هييه هيه

ننتقل إلى استديو منظره يكسف، شويه بلاليين من أم شلن الواحدة على كام فرع زينه بنص جنيه مع خلفية مكتوب عليها كل عام وأنتم بخير بخط رديء..

وبعدين تيجى الكاميرا على الست الهانم المذيعة اللي حاطه مكياج بثمن الأستديو كله.. هي وواحدة زميلتها ويستلموا المشاهدين..

الأولى ( بابتسامه لزجه): كل سنة وأنتو طيبين أعزائي المشاهدين وعيد سعيد عليكم بس يا رب بقى متزودوش أكل اللحمه عشان صحتكم.. هاهاها..

الثانيه: "بالضبط زى ما قلتي يا انشراح، مش عايزين الناس تزود في أكل اللحمة عشان الصحة طبعا، الاعتدال مطلوب (ولا كأن الشعب المصري غرقان في الملذات ونائم على تل فلوس والحكومة الله يكرمها صرفت لكل مواطن عجل).

إنشراح: فعلا يا وداد، الاعتدال مطلوب.. وخلينا الأول نرحب بالمشاهدين في برنامج صباح الخير يا عيد.. وهنقدملكم النهاردة فقرات عديدة ومتنوعة بمناسبة العيد.

فاصل غنائى

أهلا أهلا بالعيد

مرحب مرحب بالعيد

أهلا أهلا بالعيد

مرحب مرحب بالعيد

هيه هيه هيه

هييى هييه هيه

عودة الى الأستديو.

إنشراح: أهلا بيكم من جديد أعزائى المشاهدين ودلوقتى بنقدملكم أولى فقراتنا.. صحتك فى العيد. ومعانا الأستاذ الدكتور على أمعاء، أستاذ ورئيس قسم الباطنة.. طبعا البيه قاعد منتفخ على الكرسى بتاعه زى ما يكون طالع في الـCNN

- د. على أهلا بيك.. وكل سنة وأنتا طيب.

-أهلا و سهلا بيكى و كل سنة وسيادة الرئيس والحكومة ووزارة الصحة بخير.. وعلى فكرة حضرتك نسيتى في التقديم بتاعي أنك تقولي أنى صاحب مستشفى العلا الخاصة.

- انشراح: آه بس كده يبقى إعلان يا فندم!

- د. على (و هو يتصنع الإحراج): أخ.. أنا أسف جدا.

- لا يهمك يا دكتور.. المهم حضرتك تنصح الناس بأيه في العيد، طبعا إحنا عارفين النصيحة التقليدية بالاعتدال في..

-د. على مقاطعا: اعتدال!.. الله.. ما تسيبوا الناس تأكل براحتها، أنتو هتبصولهم في النعمة؟!

-وداد: آه يا فندم بس إحنا عارفين أن الأكل الكثير ممكن يسبب متاعب للبطن وتلبك معوي و..

- على: و ماله؟! أمال الدكاتره راحت فين..

ما هى الناس لو ما مرضتش الدكاتره هيشتغلوا ايه؟ هيكنسوا الطريق يعنى!!.. وأولادنا اللي يتخرجوا من كليات الطب دول هنشغلهم فراشين يعنى.. لأ طبعا الناس لازم تتعب عشان الدكاتره تشتغل.. مش كده ولا إيه؟ ( بابتسامه صفرا )

-انشراح (بابتسامه أكثر اصفرارا ) آه طبعا يا دكتور دي سُنة الحياة هاهاهاهاهها.

و ينفجر الثلاثة في الضحك بينما يتساقط المشاهدون أمام شاشه التلفاز..

-وداد: طيب حضرتك تنصح أي مواطن يحس بأي تلبك معوي بإيه؟

د.على: و الله بلاش فتىّ، عليه وعلى أقرب مستشفى.. بس حفاظا على حياته أنا أنصحه يبعد عن المستشفيات الحكومية التعبانة ويروح على أقرب مستشفى خاص.. وخصوصا مستشفى العلا.. الخدمة فيها ممتازة وترد الروح و..

-تقاطعه انشراح: آه طبعا طبعا متشكرين قوى يا دكتور على النصايح الغالية دي وكل سنة وحضرتك طيب.

د. على (من تحت ضرسه): العفو و كل سنة و سيادة الريس والحكومة ووزارة الصحة بخير.

عوده إلى وداد و بابتسامه مقيتة: وهكذا أعزائي المشاهدين كانت الفقرة الأولى لنا اليوم...

فاصل غنائي ونكمل مع بعض بقية فقراتنا..

أهلا أهلا بالعيد

مرحب مرحب بالعيد

أهلا أهلا بالعيد

مرحب مرحب بالعيد

هيه هيه هيه

هييى هييه هيه!

ورجعلناكو تانى أعزائي المشاهدين بعد الفاصل الغنائي الجميل ده.. مش كده يا وداد..

- فعلا يا انشراح أغنيه أهلا بالعيد الناس بتستناها من العيد للعيد.

و دلوقتى بقى إيه رأيكم أعزائي المشاهدين نأخذ جولة في العاصمة ونشوف انطباعات الناس عن العيد إيه؟

- يا سلام يا وداد طبعا دى هتبقى حاجه ممتازة

- طيب يلا بينا.

تنتقل الكاميرا إلى منظر عام في الشارع، جحافل من المواطنين متجمعين حول المذيع الذي أخذ ينفضهم من حوله وكاد أن يسب أحدهم لولا أن نبهه المخرج في أخر لحظه أنهم على الهواء مباشرة.

- أعزائي المشاهدين، طبعا الأنظار كلها تتجه في هذه الأيام إلى نجم العيد وبطل هذه المرحلة.. الجزار.. ومعانا دلوقتي المعلم حنفي أبو كرش، طبعا المعلم حنفي لابس الحتة اللي ع الحبل ومتشيك وآخر قلاطه.

- طبعا يا معلم العيد بقى وموسم و الناس كلها بتشتري لحمة و..

- وأنتو هتبصولنا في النعمة ولا إيه.. يا أستاذ أنتو جايين تعملوا برنامج لا جايين تنقوا علينا..

- لأ طبعا يا معلم، أنا بقول دا موسم يعنى وكده (ابتسامة مرتبكة).

- المعلم حنفى (بقرف): آه يا سيدي دا موسم، و كل سنة وسيادة الرئيس والحكومة ووزارة التموين بخير.

- و يا ترى بقى يا معلم اللحمة دى من السلخانة؟

- أمال من بيتنا؟! ما ترحمنا بقى يا أستاذ من الأسئلة السخيفة دى؟

- المذيع بارتباك: هههه طبعا يا معلم أنا عارف بس بضحك معاك.. عيد بقى.. وإيه أخبار اللحمة السنة دي..

- الله ..ما أنتا لاهفلك خمسه كيلو على ما قُسم، إيه ما عجبكوش!!.

- جحظت عينا المذيع و سارع بالقول: آه قصدك الخمسة كيلو اللي أنا اشترتهم منك، لأ كانوا ممتازين الصراحة.

- "يتلمظ" المعلم حنفي بشفتيه ويقول: شاريهم.. طيب..

- طيب يا ملعم منعطلكش بقى إحنا عارفين إنتا لسه وراك بيع ودبح ما شاء الله

- يا ساتر يا رب.

ويلتفت المذيع إلى الكاميرا ويرسم ابتسامه بلهاء على شفتيه ويقول: و كده أعزائي المشاهدين نكون قدمنا لكم تقرير شافي ووافى عن أسعار اللحمة في السوق.. شكرا لحسن المتابعة و كل سنة وأنتم طيبين.

فاصل غنائى

أهلا أهلا بالعيد

مرحب مرحب بالعيد

أهلا أهلا بالعيد

مرحب مرحب بالعيد

هيه هيه هيه

هييى هييه هيه

ورجعنالكم تانى أعزائي المشاهدين بعد التقرير الجميل اللي وافانا بيه الزميل مرسى عوضين.. إيه رأيك في التقرير يا وداد؟

- لأ خرافه.. بصراحة مرسى عمل شغل جامد جدا وقدملنا معلومات مفيدة للغاية

ودلوقتى بقى أعزائي المشاهدين معادنا مع فقره.. الحكومة والعيد!، ويسعدنا أن نستضيف في الأستوديو السيد عباس القرش المسئول بوزارة التموين، والسيد عبد الله التمساح المسئول بوزارة الصحة.. (طبعا الاتنين قاعدين زى أسدين قصر النيل وعينيهم مبرقه زى صقر أعور).

- كل سنة وأنتا طيب يا أستاذ عباس وأستاذ تمساح وعيد سعيد عليكم.

- كل سنه وسيادة الرئيس بخير والحكومة ووزارة التموين ووزارة الصحة.

- عايزين نعرف من حضراتكم إيه استعدادات الحكومة للعيد.

- يتنحنح عباس القرش و يقول: و الله وزاره التموين عملت اللي عليها وقمنا بتوفير اللحمة بجميع منافذ البيع و بأسعار رمزية.

-يعنى مفيش مشكله أو نقص في الكميه يا فندم؟

- إطلاقا.. دا المشكلة أن المواطنين مش معبرين اللحمة دى وعمالين يشتروا من محلات الجزارة.. وأنا باعيب ذلك على الأخوة المواطنين وبقولهم لو مش عايزين اللحمه المدعومه يقولولنا بدل ما الدولة مشكورة تتكبد كل الاموال دى وبعدين محدش يشترى..

-طيب وإيه أخبار وزارة الصحة يا أستاذ تمساح؟

- بخير والحمد لله.. تم التأكيد على كافه رؤوس المواشي اللي في السوق وتفتيش كامل على كافة محلات الجزارة وطوارئ أربعة وعشرين ساعة في مستشفياتنا الممتازة اللي كان بيتبلى عليها الأستاذ اللي جه في الفقرة الأولى..

-عظيم عظيم ..طب ناخد أول تليفون معانا.. ألو

- صوت جهورى: ألووووووو.. الو يا تلفزيون.

-أيوة أيوة يا فندم مع حضرتك، نتشرف باسمك..

- أنا المعلم حنفى أبو كرش، ممكن أكلم السادة المسئولين..

- اتفضل أهم معاك، لو عايز توجه لهم التهنئة..

- تهنئة؟؟ يا سيد تمساح، يا سيد قرش.. يرضيكم الكلام دا؟

- الله.. في إيه يا أستاذ حنفي؟

- إيه اللي في إيه.. يا عالم حرام عليكم دا مفيش مفتش من وزارة الصحة أو التموين إلا أما يلهفله 5 كيلو وهوا ماشى دا غير الشاى و...

- الله الله الله! أنا مسمحلكش يا أستاذ حنفي.. موظفينا على أعلى درجة من الشرف والنزاهة وأنتا اللي تلقاك شغال شغل مش مضبوط..

- حسبى الله و نعم الوكيل، يا سيد تمساح الجزارة اللى جنبنا بتبيع لحم حمير لكن عشان صاحبها بيدفع المعلوم بيعدوه أنا بقى..

- ألو.. ألو.. الظاهر الخط قطع.. إيه رأيك في الكلام دا يا سيد تمساح؟

- لأ طبعا دا كذب وتلفيق ومزايدة على أمانة الموظفين.. موظفينا أشرف من الشرف وأنزه من النزاهة..

- أكيد طبعا يا فندم .. وبنشكر حضراتكم على المعلومات القيمة دي وكل سنة وـنتم طيبين.

- كل سنة وسيادة الرئيس والحكومة بخير إن شاء الله.

- ودلوقتى أعزائنا المشاهدين ميعادنا بقى مع الضحكة والمتعة والتسلية والمسرحية الكوميدية الشهيرة المتزوجون.

بس الأول نسيبكم مع فاصل غنائي!

ومع بداية الفاصل كان أمام شاشة التليفزيون أسرة مصرية أمام التلفزيون دار بين أفرادها الحوار التالي.

الله.. مش دى المسرحية اللي بيجيبوها من عشرين سنه !

-آه دا غير بقى ُسك على بناتك وشاهد ما شافش حاجه.

- يا ساتر يا رب.. نفس البرامج ونفس الفقرات ونفس الكلام اللي بيتقال كل سنة

- هما عاوزين يطفشونا من التلفزيون ولا هما متواطئين مع الفضائيات ولا إيه..

بقولكم إيه.. إحنا لا هنبقى مع دول ولا هنكرم دول..

- يعنى هتعمل ايه؟

- استنى وانتا تشوف..

يذهب الى البلكونه و ينادى في الشارع

- وله يا دقدق..وله يا دقدق

- أيوه يا برنس

- روح للواد مجدى ستالايت.. وقوله عايزين الوصلة أم عشرين جنيه..

اقرأ أيضا

عيد الأضحى.. دماء ومخلفات!

في صلاة العيد.. كنت إماما!

بيدي لا بيد بوحة!

الخرفان بتحبك يا ريس..!

العيد فرحة.. ياسلام!

العيد.. رقص ورهينة في محطة مصر!

التخصص يكسب.. في المدبح

دعاء الإمام الأصغر في العيد

364e