في السينما.. أي خدمة يا باشا!
مشاهدة السينما متعة لا يعرفها إلا القليل جداً.. الذين إذا أظلمت بهم الصالة وأضاءت شاشة العرض، انفصلوا عن العالم ودخلوا في عوالم أسطورية.. في عبقرية التصوير ..الموسيقية التصويرية تسلب لُبك..عينيك مغرورة بالدموع.. وفجأة..
فجأة .. تجد صوتا أجشا يدنو من أذنك "حاجة ساقعة يا أستاذ...بكككككك".. والبككككك هذا صوت "الكانز" الذي فتحه أمامك لتشتريه.. إذا حدث لك هذا فأعلم جيداً انك أكيد ..أكيد .. في سينما من سينمات وسط البلد التي يفترض أنها كانت من أعرق وأشهر السينمات في مصر..
هه فين البقشيش
فعندما تضطرك الظروف وتقرر دخول أحدها سيتقبلك في البداية من تقطع لك التذاكر في الشباك "أي خدمة يا فندم".. "تذكرتين حضرتك".. "طيب أنا هنقيلك كده مكان زي الفل..وأي خدمة يا باشا".. "أي خدمة يا باشا بقى..أي خدمه..هه".. وطبعا "هه" دي طلب واضح وصريح أنها تريد بقشيش.. "على أيه معرفش".. ربما لأنها تكرمت وتعطفت وقامت بهذا المجهود الخرافي وهو أخذ النقود مني وإعطائي بدلا منها تذاكر!!
المهم.. بعد حصولك على التذاكر يتلقفك شخص واقف بجوار الشباك ويصطحبك إلي الداخل "أتفضل يا باشا..أي خدمة يا باشا.. كل سنة وأنت طيب".. وبالطبع أنت سائر معه متخيل أنه يأخذك إلى صالة العرض لكن تكتشف أنه صحبك إلى كافيتيريا السينما ..فتجلس.. لتأتي لك فتاة تقف جوارك.."تشرب إيه يا فندم".. "لا..ميرسي".. "لا لازم تشرب يا فندم".. "مش عايز".. "طيب خد إزازة مياة صغيرة"!.
هنا تشعر أنك دخلت شارع الشواربي.. أو وكالة البلح وليس دارا من المفترض أنها مخصصة للفن السابع.. بعد ذلك تتذكر أنه عليك أن تشاهد فيلما فتتجه إلي الصالة أو إلي البلكون لو كانت السينما من الطراز الذي مازال به بلكون.. فتجد الرجل الذي يصحبك لكرسيك يقول لك.."عندي على جنب هنا جزء لوج لو حضرتك عايز يعني".. بمعنى أنه يريد أن تعطيه مالا كثيرا ليجعلك تجلس في مكان أفضل.. ومال فقط ليجعلك تجلس في مكانك الذي قد حجزته!
والأمر في كل الاحوال ليس اختياريا، فالبقشيش حق مكتسب يجب أن تدفعه.. وإن لم تفعل ذلك تحل عليك لعانتهم ونظراتهم النارية ولزوجتهم المستفزة.. لتخرج في نهاية الفيلم تكره نفسك لأنك فكرت أن ُتقبل على تلك الفكرة العقيمة!
كله بيعمل كده
عن البقشيش.. حاورت أحد العاملين بإحدى سينمات وسط البلد والذي رفض ذكر اسمه لأنه "أكل عيشه"..
أنت عندك كام سنة ؟ وخريج إيه؟
23 سنة .. ومعايا ثانوي صنايع.
بقالك كام سنة بتشتغل هنا؟
سنتان تقريباً
بتشتغل كام ساعة؟
9 ساعات.
وبتقبض كام من هنا؟
300 جنيها.
والمهية بتكفيك؟
المهية مش بتكفي طبعاً..أنا بعتمد أكتر على التيبس "البقشيش".
و بتاخد كام تيبس في الشهر تقريباً كده؟
لأ.. التيبس بناخده باليوم، وأخر اليوم بنجمع الفلوس كلها اللي أخذتها أنا وزمايلي وبنقسمها على بعض.
وبيطلع لك كام في اليوم؟
يعني من 10 لـ 30 جنية في اليوم، وفي الأعياد بيبقى أكتر.
ولو محدش أعطاك تيبس بتسكت ولا بتعمل ايه؟
ساعات بحاول ألفت نظره، يعني أقوله كل سنة وأنت طيب كده يعني.. أصل واحد دافع فلوس عشان يدخل سينما مش هتقصر معاه لما يديني جنية ولا نص يعني!
ومش بتبقى مضايق أو محرج وأنت بتعمل كده؟
في الأول بس أول ما اشتغلت.. بعدين زمايلي قالوا لي أن كله بيعمل كده.. ده غير أن صاحب الشغل قالي ان مرتبي قليل عشان أنا بيبقى ليا تيبس.
لو حد أعطاك تيبس كتير وعمل حاجة مخالفة في السينما.. بتسيبه؟
لا طبعا.. بلفت نظره الأول براحة ولو مخدش باله بقوله..
بتلفت نظره ازاي ؟
بكح!
طبعا كل الأفلام الجديدة بتتفرج عليها هنا؟
آه بتفرج ..بس دايماً بيفوتني اول جزء من الفيلم بس بستنتجه يعني.
وهل كل الافلام بتعجبك؟
هنا بيعرضوا أفلام كويسة وبحبها.. ومع الوقت بقيت بعرف أفرق بين الفيلم الحلو والفيلم الوحش.
أزاي؟
بعدد الناس اللي بتدخله طبعا!
6e37
4 شارع زينهم الجديد السيدة زينب
أرسل هذا التعليق بواسطة : عمرو حسين عبده
السلام عليكم و رحمت الله و بركاته 0 انا نفسي اشتغل في اي حاجه حلال انا في دبلوام صنايع ونفسي بجد اشتغل في اي حاجه ياريت اكوان في بالكو
77شارع عبد العزيز البان بولاق الدكرور
أرسل هذا التعليق بواسطة : حسام مصطفى رفاعى
نفسى اكون ممثل