كتاب مالوش اسم .. سموه أنتم!

"كثيرة هي علامات الاستفهام فى الدنيا ونادرة جدا الإجابات والكتاب ده مش هيبقى فيه إجابات ولا حاجة وحتى لو هيبقى فيه هو مش مقصود منه الإجابات المقصود الأفكار والأسئلة بس".

هذا هو رد المذيع الشاب "أحمد العسيلى" على قرائه عن مضمون أول كتاب له التى نفذت طبعته الاولى بعد أسبوعين من صدوره مما جعل دار النشر تطبع الطبعة الثانية والثالثة معا.

فبعد ما عرفنا العسيلي كمقدم برامج له شكله الخاص المعروف بالنقد اللاذع لسلبيات المجتمع نتعرف عليه ككاتب لاول مرة فى "كتاب مالوش اسم"، الكتاب الذي فكر كثيرا لعنوان يشمل محتواه حتى توصل إلى عدم اختيار اسم هو أفضل حل، ليطلب من قرائه فى نهاية الكتاب اطلاق اسم له كما يريد كل منهم "دلوقتى ممكن تسموه زى ما أنتم عايزيين.. سلامات".

معلومات عن الكتاب:

الكاتب: أحمد العسيلى

دار النشر: دار الشروق

تصنيف الكتاب: فلسفى ساخر

سعر الكتاب: 22 جنيه

عدد الصفحات: 199

سنة النشر : 2009

الطبعة : الأولى

أماكن التوزيع: الشروق – البلد – ديوان

عن الكتاب :

الكتاب عبارة عن مجموعة كبيرة من الاسئلة كل سؤال عنوان لمقالة جديدة، الأسئلة منها بالتاكيد ما دار في أذهاننا في يوم ما، منها:

- "هو ربنا هيحاسبنا إزاى ؟؟"، ويقول: "أوعوا تخلوا أي مدعي علم ما لا يعلم يبيعلكوا أفكار ومفاهيم بتاعته على أنها الحقيقة، المشكلة إن الواحد مبيفكرش لوحده، كل اللي نعرفه عن الدين عرفناه عن طريق ناس بطريقتهم هما وفكرهم هما لأن مفيش حرية تفكير إحنا دايما متلقين".

- "عايز إيه؟؟ " ويجيب: "عايز فلوس دي الإجابة الطبيعية للسؤال ده دلوقتي، لكن كل الحاجات المهمة فى الدنيا الفلوس ما تقدرش تشتريها لأننا هنفضل نجري ونسابق الوقت لغاية لما نموت ونبقى معشناش، لازم نقف شوية نبص حوالينا ونشم وندوق ونفكر ونعرف إحنا بنعمل إيه هنا".

أفضل ما فى الكتاب :

تشعر وأنت تقرا الكتاب أنك تشاهد حلقة من برامج العسيلى، تسمع صوته وترى تعبيرات وجهه مما يجعل الكتاب شيق وممتع، خاصة أنه يحاول البحث عما وراء الأشياء، عن الأسباب الحقيقية وليس الواضح والسهل ويطلب من الناس التفكير فقط والتخلي عن سياسة القطيع التى تعودنا عليها أملا فى التطوير والتقدم.

أسوأ ما فى الكتاب :

تشعر وأنت تقرا الكتاب أنك متفق معه تماما ولكن غير قادر على التفاعل لأنه يعالج الأمور من وجهة نظر "المدينة الفاضلة" بدون الاحتكاك بالواقع المر، ولكن طالما وافقت أن تقرا الكتاب فيجب أن تستجيب لرغبة الكاتب فى أن تفكر فيما هو مكتوب.

مقتطفات من الكتاب:

- "خداع بصر" تقول لحد صباح الخير يقولك عليكم السلام، تقول الرسول يقولوا عليه الصلاة والسلام، ناس تتخانق تقول لا إله إلا الله، ناس تتصالح يقولوا سبحان الله، تجيب حاجة جديدة «ما شاء الله»، تركب الأسانسير تقرا دعاء الركوب، تروح محل تسمع قرآن تركب تاكسى تسمع قرآن، تكلم حد فى التليفون ويحطّك على الـ waiting تسمع قرآن برده، والجوامع عامرة وعمرو خالد له ملايين المريدين، وملايين أكتر بيصلوا التروايح فى رمضان، ومش برامج دينية بقه لأ ده كان زمان، دى محطااااات.. الله الله، حلو أوى الكلام ده ولو حد شافنا بره يقول ده الناس دول كلهم هيروحوا الجنة طابور.

- "الموت" ما حدش يقدر ينكر أبدا إن الموت عنده ميزات عبقرية، فجأة كده تخلص كل مسئوليات البنى آدم، كل حاجة خايف منها فى الدنيا، كل حاجة كانت قلقاه، كل حاجة كانت وراه وما بيعملهاش، ومحسساه إنه مقصّر، فجأة يبقى مش محتاج تاني ياخد قرار صعب، فجأة يبقى مش محتاج يبذل مجهود عشان يعرف يقول إيه ولاّ يتصرف ازاى، فجأة يبقى مش مهم خالص كل الناس فاكرين إيه، فجأة يبقى الماضي والمستقبل حاجة واحدة..ياااه.

ننصحك بقراءة الكتاب إذا كنت من :

محبي برامج أحمد العسيلى عموما.

محبي رباعيات صلاح جاهين.

محبي الكتابة الساخرة بشكل عام.

محبي التفكير في كل شيء.